ACF ta organisa anochi informativo den bario di Bringamosa

Habitantenan di bario di Bringamosa ta atende anochi informativo pa siña mas tocante e Yellow-shouldered Amazon.

ORANJESTAD, ARUBA – 11 OCTOBER 2024 – Den e siman cu a pasa, Aruba Conservation Foundation a colabora cu habitantenan di bario di Bringamosa pa organiza un anochi informativo riba e topico di e Yellow-shouldered Amazon, miho conoci como e ‘Lora’. Desde e reintroduccion di e Lora bek den naturalesa di Aruba den januari di e aña aki, e Loranan a sigi adapta y ta explora pafo di areanan di naturalesa protehi asina yegando e bario di Bringamosa. Esaki a haci cu ACF a organiza un anochi informativo pa asina comparti mas cu e residentenan di Bringamosa di con pa comporta ora di mira of topa cu e Lora. Atendi pa mas di 20 habitante, e anochi tawata exitoso y por bisa cu e residentenan ta mas cu dispuesto pa haci nan parti pa proteha e Lora. Como un muestra di aprecio, ACF a regala diferente matanan di fruta na e habitantenan pa planta den nan hardin, asina creando mas fuente di cuminda pa e Lora y otro especienan.

Te cu januari di e aña aki, e Lora tawata extinco den Aruba su naturalesa debi na diferente menasanan cu e Lora e keda enfrenta cune y mayoria di e menasanan aki ta di origen humano (Birdlife International 2017, Silvius 1991) manera jaagmento illegal pa bendemento como mascota, y matamento di e Lora pa motibo cu e ta wordo considera un plaga pa agricultura (Voous 1983). Otro menasanan local serio ta especienan manera pushi y djaka y tambe e Boa cu ta un especie invasivo cu a wordo introduci na Aruba den añanan 1990, pues ta prome biaha cu e especie di Boa y especie di Lora lo co-existi den Aruba su naturalesa. Un otro menasa cu a contribi na e extinction di e Lora ta e desaparecion di nan habitat causa door di rosamento pa desaroyo.

Despues di 2 aña di hopi esfuerso y trabou incansabel di e team di Aruba Conservation Foundation hunto cu diferente partnernan clave local, regional e internacional, e aña aki a reintroduci 25 ‘Lora’ bek den naturalesa di Aruba y nan ta floreciendo y adaptando hopi bon mes. Nan ta goza di come mata di yuwana, cadushi, boonchi di mata di hubada y mucho mas. Y awo cu ta temporada di awa, nan lo por disfruta di hopi mas cuminda di Aruba su naturalesa.

E Lora tin un funcion ecologico importante pa nos naturalesa, particularmente den e distribuimento di simia contribuyendo na e engradecimento di nos flora y fauna, cu na nan turno ta sostene un esencia mas amplio di e bida salvahe.

Ta tuma un comunidad completo pa proteha e Lora na Aruba y ACF ta hopi agradecido na henter e bario di Bringamosa pa a ricibi e team cu hopi entusiasmo y cu un compromiso di yuda proteha e Lora. ACF ta haci un suplica na e resto di comunidad di Aruba p ayuda monitoria e Lora cu ta marca y mantene wowo y orea habri. Si topa un Lora, raporta esaki na ACF su Wildlife Hotline via WhatsApp na +297 5924476 of manda un email na info@acf.aw cu informacion di unda a mira e Lora incluyendo GPS location of den cua bario of vecindario, y cuanto Lora a wordo mira.