ORANJESTAD, ARUBA – 24 MAART 2026 – Aruba Conservation Foundation a celebra Dia di Himno y Bandera 2026 den grandi, unda a invita comunidad henter pa un celebracion interactivo di Aruba su identidad y naturalesa den Parke Nacional Arikok.  

Bou di e tema “Bin Tende Naturalesa Papia”, famianan, muchanan y bishitantenan a pasa un dia yen di descubrimento y conexion cu naturalesa. ACF ta hopi contento di mira e cantidad di muchanan cu a disfruta di nan experiencia den parke, specialmente durante e scavenger hunt den Hofi Shon Shoco, unda participacion a supera tur expectativa. Muchanan a bay riba un busceda pa test nan conocemento di Aruba su especienan nativo. 

E evento a bira un punto di encuentro entre comunidad y naturalesa, cu presencia di fundacionannan comprometi na e conservacion di naturalesa. ScubbleBubbles Foundation a hiba grandi y chikito pa conoce e munda bou awa atraves di realidad virtual (VR) y Ban Lanta y Planta a educa riba matanan nativo y e importancia di hardin nativo na cas. ACF mes a organisa dos diferente hike completamente gratis pa Cunucu Arikok y Miralamar cu a mira bon participacion. Tambe, tawata tin un skina creativo pa mucha unda muchanan di tur edad por a pinta, hunga bingo y mucho mas bou guia di ACF su Visitor Experience Team. 

Artesanonan local manera Mersea Jewelery, Arubalife Organics, Gypsy Therapy y Gerella Healthy Smoothies tambe a forma parti di e dia akinan cu nan creacionan unico. ACF kier expresa su sincero gradicimento na tur participante y asociadonan pa a contribui cu nan conocemento, creatividad y compromiso pa conserva Aruba su naturalesa 

Pa esnan cu a no logra bishita, semper tin mas momento pa conecta cu naturalesa y explora Parke Nacional Arikok. Parke ta habri tur dia di 8’or di mainta te 4’or di atardi. Muchanan ta drenta gratis, mientras entrada pa localnan ta solamente 5 florin cu un I.D. local valido. Tambe tin e oportunidad pa registra pa bo Annual Conservation Pass pa 50 florin y sigui conecta cu naturalesa durante henter aña. 

Dia di Aruba su Himno y Bandera a mustra un biaha mas cu naturalesa no ta separa di nos identidad, e ta parti di dje. Y e historia ey ta sigui biba den cada bishita, cada paso, y cada experiencia den Parke Nacional Arikok y den cada esfuerso di ACF pa conserva esaki. 

Aruba Conservation Foundation ta keda comprometi na crea experiencianan y actividadnan cu ta inspira y concientisa local y bishitantenan riba e rol importante cu naturalesa ta hunga den nos bida diario. Keda pendiente pa mas actividadnan interactivo durante aña. 

Pa conoce mas di Aruba Conservation Foundation of pa book un experiencia den Parke Nacional Arikok por bishita www.acf.aw.